失敗之作

臨李曉明─山茶蝴蝶

幾經艱苦，做到腰酸背痛至做到仿古色，平塗正葉嘅草綠時已知雲母漏礬，顏色又偏藍，反正要實驗，置之死地而後生，一於喺草綠上+朱膘+蕂黃+墨，務求有古舊嘅草綠色，改好古舊嘅草綠色後，然後用墨分染，正中嘅葉子即刻死咗，再改用墨青分染，漏礬越來越嚴重，只有向幾片冇事嘅葉子埋手，看看效果如何，做到呢度已經勊得很，又夠鐘收工，而呢張圖由勾線到而家，耗時廿個鐘，又可以長埋喺字紙籮裏。

亂畫一通

拎出之前喺網上攞嘅山水古畫，雖然仲未學到，仍然死心不息自己亂畫，但聽 carmen 講原來呢張係工筆山水，呢類有屋仔有人仔嘅佈局更合我意，本來畫裏面有嘅人物因唔識畫，所以已經自動忽略，但畫到其他部份至知，樹，畫唔掂，石頭，更唔掂，連茅草舖嘅屋頂都唔掂，老師，好難畫啊！難怪老師話如果學山水，最少要放兩年時間。

臨李曉明牡丹完成圖

上次墨紅色的牡丹因為漏礬，最終都要放棄，好想畫一朵白色的牡丹，但又不想花時間練另一張牡丹圖，於是將上次墨紅色牡丹嘅圖改成白色，另外再加一只蝴蝶，得 carmen 指點，執過部份花瓣暗位和葉子層次之後，就開始第一次畫蝴蝶之旅，蝴蝶係第一次畫，所以留到最後邊看視頻邊畫，未到邊、過界、手震等等層出不窮，用放大鏡都畫到一塌糊塗，噚日畫咗半日蝴蝶，今日再執梗、莖、花蕊、花絲和老幹部份，總算是第一次完成一張完整的牡丹圖，雖然蝴蝶部份好肉酸，花頭亦唔夠好，因為呢張花房周圍唔夠深色，所以突顯唔到花蕊，而家知道點解要咁深色囉~

臨李曉明牡丹 III

得 carmen 指點，再執過部份花瓣暗位和葉子層次，然後開始第一次畫蝴蝶之旅，未到邊、過界、手震等等層出不窮，用放大鏡都畫到一塌糊塗，現只餘梗、莖和老幹部份，老幹又係我嘅死穴。